In die laaste hoofstuk van Kweek Kinders met Karakter raak Hettie prakties en gesels oor ’n gesonde benadering tot dissipline sodat ons die groter doel van karaktervorming verstaan.

Onthou dat deernisvolle dissipline die volgende is:

• ’n Langtermynperspektief. Ons dink oor die toekoms van ons kinders en minder oor die dissiplineringsoomblik waarin ons van uur tot uur verkeer.
• Ons onthou dat kinders se kernbehoeftes aangespreek moet word voordat ons goeie gedrag kan verwag. As jy dus nog nie ’n lysie iewers opgeplak het om jou aan jou besondere kinders se behoeftes te herinner nie, wil ek jou vra om dit te doen voordat jy verder lees.
• Ons moet die redes vir ons kinders se wangedrag verstaan voordat ons met die een of ander “oplossing” probeer inspring. Meeste dissiplinêre situasies het meer te doen met ontbrekende vaardighede as met ongehoorsaamheid.

Moedswillige ongehoorsaamheid (Bl. 237)

As ons heel eerste die rede agter gedrag probeer verstaan, werk ons gou-gou uit met watter een van die 8 tipes wangedrag ons te doen het.

Wat het, weet, verstaan of doen my kind nog nie?

Kinders wat nie die redelike opdragte uitvoer wat hulle ouers en ander gesagsfigure gee nie, is moedswillig ongehoorsaam. Redelike opdragte is
alles wat ons kinders verstaan, onthou, in staat is om te doen maar kies om nie te doen nie. Ongehoorsame gedrag kan blatant en konfronterend
wees (“Nee, ek sal nie!”) of agteraf, soos wanneer kinders aanhou om ná slaaptyd nog met hulle fone besig te wees.

Hoe kan ek dit wat kortkom vir my kind gee of leer?

In die geval van moedswillige ongehoorsaamheid is daar geen vaardighede om in te oefen nie. Wat my kind kortkom is goeie besluitneming gebaseer op ’n duidelike boodskap oor wat aanvaarbaar en onaanvaarbaar is. Ek moet wel seker maak dat ek op so ’n manier praat dat my kinders wil luister.

Hoeveel keer moet ek praat?

Hier is ’n 40min opname oor goeie opdragte deur Hettie Brittz.